සිය ගණනකගේ ජීවිත බේරාගැනීමට උපකාරී විය හැකිව තිබූ ඉතා වැදගත් බුද්ධි තොරතුරු රටේ නායකයන් අතර පවතින ආරවුල නිසා නොසලකා හැර ඇතැයි විශේෂඥයන් උපුටා දක්වමින් ප්‍රංශ පුවත් සේවය ඉකුත් දිනෙක වාර්තා කළේය.
බුද්ධි අංශ මගින් කරන ලද අනතුරු ඇඟවීම් මත ක්‍රියාත්මක වීමට නොහැකි වූයේ විවිධ අඩුපාඩු නිසා යැයි රජය පිළිගත් අතර දීර්ඝ කාලයක් මුළුල්ලේ පවතින දේශපාලන අර්බුදය නිසා එසේ අඩුපාඩු සහ
නොසලකා හැරීම් සිදු වී ඇතැයි ද එම විශේෂඥයන් පෙන්වා දී ඇත.
විදෙස් බුද්ධි අංශයක අනතුරු ඇඟවීම් උපුටා දක්වමින් අප්‍රේල් මස 11 වැනිදා පොලිස්පතිවරයා අනතුරු ඇඟවීම් නිකුත් කර ඇත. අන්තවාදී ඉස්ලාමීය සංවිධානයක් වන ‘ජාතික තව්හීත් ජමාත් (එන්.ටී.ජේ)’ සංවිධානය මෙරට ප්‍රධාන පෙළේ කතෝලික දේවස්ථානවලට මරාගෙන මැරෙන බෝම්බ ප්‍රහාර එල්ල කරන බවට එම අනතුරු ඇඟවීම්වල සඳහන්ව තිබී ඇත.
පොලිස්පතිවරයා නිකුත් කළ අනතුරු ඇඟවීමේ ලිපිය තවත් ප්‍රධානීන් කිහිපදෙනකුටම යවා ඇති නමුත් එම අනතුරු ඇඟවීම් ලිපි අගමැතිවරයාට හෝ රාජ්‍ය ආරක්ෂ අමාත්‍යවරයාට යවා නැත. එය තරමක පුදුමය දනවන්නක් බව මෙම අවුල් සහගත දේශපාලන සිදුවීම්වලට සමීප විශේෂඥයන් පවසා ඇත. මෙම දේශපාලන වියවුල ප්‍රධාන වශයෙන් පවතින්නේ ජනාධිපති මෛත්‍රීපාල සිරිසේන සහ අග්‍රාමාත්‍ය රනිල් වික්‍රමසිංහ යන මහත්වරුන් අතරය.
රටේ ආරක්ෂක සහ නීතිය හා සාමය අමාත්‍යවරයා ලෙස කටයුතු කරන්නේ ද ජනාධිපති සිරිසේන මහතාය. “අගමැතිවරයා සමඟ පවතින යුද්ධයේදී ජනාධිපතිවරයා විවිධ ආකාරවලින් ඔහු දුර්වල කිරීමට උත්සාහ කරනවා. උදාහරණයකට ජනාධිපතිවරයා පොලිසිය ඔහුගේ යටතට ගත්තා” යැයි බුද්ධි තොරතුරු එක් රැස් කරන සංවිධානයක් වන “ඉන්ටර්නැෂනල් ක්‍රයිසිස් ගෲප්” ශ්‍රී ලංකා විශේෂඥ ඇලන් කීනන් මහතා පැවැසීය.
“ඒ නිසා පොලිසිය ජනාධිපතිවරයා සමඟ නොසිටින අමාත්‍යවරුන් සමඟ එවැනි තොරතුරු බෙදා නොගැනීම වෙන්න පුළුවන් දෙයක්” ඇලන් මහතා ප්‍රංශ පුවත් සේවයට පැවැසීය. සාපරාධී නොසැලකිල්ල අගමැතිවරයා වැළැක්වීමේ ජනාධිපතිවරයාගේ ප්‍රයන්ත පසුගිය වසර දක්වා දිවයයි. ජනාධිපති මෛත්‍රීපාල සිරිසේන මහතා පසුගිය වසරේ ඔක්තෝබර් මාසයේදී රනිල් වික්‍රමසිංහ මහතා අග්‍රාමාත්‍ය ධුරයෙන් ඉවත් කළේය.
ශ්‍රේෂ්ඨාධිකරණ තීන්දුවකින් පසු රනිල් වික්‍රමසිංහ මහතා නැවත වරක් අග්‍රාමාත්‍ය ධුරයට පත් කිරීමට සිදු වුවත් දෙදෙනා අතර නොහොඳ නෝක්කාඩු තවමත් පවතී. පාස්කු ඉරිදා එල්ල වූ මරාගෙන මැරෙන
බෝම්බ ප්‍රහාරවලින් පසු අග්‍රාමාත්‍ය රනිල් වික්‍රමසිංහ මහතා ආරක්ෂක අංශ ප්‍රධානීන්ගේ හදිසි රැස්වීමක් කැඳෙව්වේය. පාස්කු ඉරිදා (21) එල්ල වූ එම මරාගෙන මැරෙන බෝම්බ ප්‍රහාරවලින් 258 දෙනෙක් මියගොස් 500කට වැඩි පිරිසක් තුවාල ලැබූහ.
එම අවස්ථාව වනවිට පෞද්ගලික සංචාරයක් සඳහා ජනාධිපතිවරයා විදෙස් ගත වී සිටි අතර හමුදා නායකත්වය අග්‍රාමාත්‍යවරයා කැඳවූ රැස්වීමට පැමිණීම ප්‍රතික්ෂේප කර තිබේ. එම හමුදා නායකයන් පිළිතුරු බඳින්නේ ජනාධිපතිවරයාට පමණක් බව නිල ආරංචි මාර්ග ප්‍රංශ පුවත් සේවයට පැවැසීය. ඔවුන් රැස්වීමට පැමිණීමට එකඟ වී ඇත්තේ අග්‍රාමාත්‍ය රනිල් වික්‍රමසිංහ මහතා ආරක්ෂක අමාත්‍යාංශයේ පිහිටි හමුදා ප්‍රධානීන්ගේ මූලස්ථානවලට පැමිණීමෙන් පසුවය.
“අභ්‍යන්තර දේශපාලන ගැටුම් පවතිනවා යනු ආරක්ෂාව නොසලකා හැරෙනවා” යැයි කොළඹ පිහිටි විකල්ප ප්‍රතිපත්ති අධ්‍යයන කේන්ද්‍රයේ ප්‍රධානී ආචාර්ය පාක්‍යසෝති සරවනමුත්තු මහතා කීවේය. “අගමැතිවරයා සහ ආරක්ෂක රාජ්‍ය අමාත්‍යවරයා මාස හතරකින් ජාතික ආරක්ෂක කවුන්සිලයට සහභාගි වෙලා නැහැ” යැයි ද ඔහු ප්‍රංශ පුවත් සේවයට පැවැසීය.
“ඔවුන් දෙදෙනා මෙච්චර කාලයක් මොනවද කළේ” යැයි සරවනමුත්තු මහතා චෝදනාත්මක ස්වරූපයෙන් විමසීය. ජනාධිපතිවරයා සහ අගමැතිවරයා අතර තිබෙන පෞද්ගලික අමනාපකම් නිසා ආරක්ෂාව සම්බන්ධයෙන් තියෙන අවධානය වෙනතකට ගියා” යැයි ඔහු කීවේය. “නායකයෝ ඉන්නේ රටේ ජනතාව ආරක්ෂා කරන්න. ඔවුන් එය කරන්න අසමත් වුණා.
ජනතාවට ඔවුන්ගේ ජීවිතවලින් වන්දි ගෙවන්න සිද්ධ වුණා. මේක සාපරාධී නොසැලකිල්ලක්” යැයි ද හෙතෙම කීය. නායකත්වය සොයා යෑම එකිනෙකාට බැණ අඬ ගසා ගැනීමෙන් පමණක්, දශක ගණනාවක් මුළුල්ලේ පැවැති දෙමළ කැරැල්ලට එරෙහිව සටන් කර ඉතා හොඳ අත්දැකීම්වලින් පරිපූර්ණ නිලධාරීන්ගෙන් සමන්විත ශ්‍රී ලංකාවේ ආරක්ෂක අංශ ප්‍රහාරය පිළිබඳ අනතුරු ඇඟවීම් නොසලකා හැරියේ ඇයි ද යන්න පැහැදිලි නොකරයි.
ජාතික තව්හීත් ජමාත් සංවිධානය ගැන සහ එම සංවිධානය ප්‍රහාර එල්ල කරනු ඇති බවට පොලිසිය දැන සිටි බව දේශපාලන විචාරකයකු වන කුසල් පෙරේරා පැවැසීය. ජනවාරි මාසයේදී පොලිසිය පොලිසිය පසුගිය ජනවාරි මාසයේදී පුහුණ කඳවුරක් වැටලූ බවත් එහිදි පුපුරණ ද්‍රව්‍ය සහ ඩෙටනෝටර් අත්අඩංගුවට පත්වූ බවත් කුසල් පෙරේරා මහතා කීවේය.
“බුද්ධි තොරතුරු එකතු කිරීම පමණ ද ඔවුන්ගේ වගකීම සැකකරුවන් ප්‍රශ්න කරන්න ඕනේ නැද්ද ? සිවිල් යුද්ධය පැවැති කාලයේදී ඔවුන් ජනාධිපතිවරයාගේ හෝ අගමැතිවරයාගේ හෝ උපදෙස් ලැබෙනකන් හිටියේ නැහැ. සැක කටයුතු පුද්ගලයෙක් ගැන දැනගත්තොත් ඔවුන් ප්‍රශ්න කළා. අත්අඩංගුවට ගත්තා, වැටලුවා” යැයි ද පෙරේරා මහතා කීවේය.
“ප්‍රහාරයක් ගැන තොරතුරක් ලැබුණාම නීතිය හා සාමයට සම්බන්ධ සහ ඊට වගකියන ආයතනවලට පුටුවකට වාඩිවෙලා විවේක ගන්න බැහැ. ආරක්ෂ ප්‍රධානීන් ඉවත් කරන බවටත් ආරක්ෂක අංශ පූර්ණ ප්‍රතිසංස්කරණයකට ලක් කරන බවත් ජනාධිපතිවරයා කීවේය. පොලිසිය බුද්ධි තොරතුරු අගමැති වික්‍රමසිංහ මහතාට හෝ ඔහුගේ කාර්යාලය ගැන හෝ ඔහුගේ කාර්යාලයට නොදීම සම්බන්ධයෙන් ද මේ වනවිට විමර්ශනයක් ආරම්භ කර තිබේ.
මේ වසරේ අවසාන භාගයේදී මැතිවරණ කිහිපයක් ද පැවැත්වීමට ඇති බැවින් මේ වනවිට වත්මන් ආණ්ඩුව දැඩි පීඩනයකට මුහුණ දී සිටී. හිටපු ජනාධිපති මහින්ද රාජපක්ෂ මහතා සිදුවීම්වලින් පසුව ආණ්ඩුවට චෝදනා කළේය. ශ්‍රී ලාංකිකයන් ආරක්ෂා කිරීමට අපොහොසත් වූ බවත් ආරක්ෂක අංශ දුර්වල කළ බවත් පවසමින් රාජපක්ෂ මහතා ආණ්ඩුවට චෝදනා කළේය.
“කෝප ගැනීමට ශ්‍රී ලාංකිකයන්ට සෑම අයිතියක්ම තිබෙනවා. ඔවුන්ට ඒ සඳහා පූර්ණ අයිතිය තියෙනවා. එහෙත් කිසිවකුටත් එරෙහිව පියවර ගන්න විදියක් නැහැ. ඒක තමයි ප්‍රශ්නේ” යැයි කීනන් මහතා කීවේය.
“බියජනක බිඳුණු හදවත් ඇති මහජනතාව නායකත්වයක් සොයා යනවා. එහෙත් ඔවුන්ට එය හම්බවෙලා නැහැ” යැයි ඔහු තවදුරටත් කීවේය.
ලංකාදීප (රජවීදිය අතිරේකය ) - 2019 මැයි 16
ඡායාරූප ප්‍රංශ පුවත් සේවය (ඒ.එෆ්.පී)
