ඇමෙරිකා එක්සත් ජනපදය හා ඔවුන්ගේ රටවල් එල්ල කරන ලද ගුවන් ප්‍රහාරවලින් පසුගිය දින 30ක කාලයේදී අයි.එස් ත්‍රස්ත නායකයන් 18 දෙනකු මියගොස් ඇතැයි වාර්තා වේ. එයින් 13 දෙනකු මියගොස් ඇත්තේ ඉරාකයේ මොසුල් හිදීය. මොසුල් යනු අයි.එස් ත්‍රස්ත ග්‍රහණයේ තිබෙන ප්‍රධානම නගරය යැයි ද පැවසේ.
ඉරාක හමුදාවල සහයට තවත් භට කණ්ඩායම් 600ක් යැවීමට කටයුතු කරන බව ඇමෙරිකා එක්සත් ජනපද රාජ්‍ය ආරක්ෂක දෙපාර්තමේන්තුව මේ සතිය ආරම්භයේදී ප්‍රකාශ කළේය. මේ වනවිටත් මොසුල් නගරය බේරාගැනීම සඳහා ඉරාක හමුදා මෙහෙයුම් ආරම්භ කර ඇත. කෙසේ නමුත් අයි.එස් ත්‍රස්තයන්ගෙන් නගර මුදා ගැනීමේ කටයුතුවලට සම්බන්ධ වෙන්නේ ඉරාක හමුදා පමණක් යැයි එරට හමුදාවේ නිලධාරීහු පැවැසූහ. ඇමෙරිකාවේ සහාය ගන්නේ බුද්ධි අංශ කටයුතු, පුහුණු කිරීම් ආදියට පමණක් යැයි ඉරාක නිලධාරීහූ ප්‍රකාශ කර තිබුණි. ලොවටම තර්ජනයක් වී තිබෙන අයි.එස් ත්‍රස්ත සංවිධානය ඉරාකයේ හා සිරියාවේ බොහෝ තැන්වල පාලනය තමන් සතු කරගෙන තිබුණද ප්‍රහාර හේතුවෙන් ඔවුන්ගේ බලය පසුගිය කාලයේදී ක්‍රමයෙන් අඩුවිය.
පසුගිය කාලයේදී අයි.එස් ත්‍රස්තයන් 3000ත් 4500ත් අතර පිරිසක් මොසුල් නගරය හැර ගොස් ඇති බවත් එල්ල වන ප්‍රහාර හේතුවෙන් ත්‍රස්තයන්ට නගරවලට ඇතුළුවීමට නොහැකි වී ඇතැයි පැවසේ.
ගුවන් ප්‍රහාරවලට හා ඉරාක හමුදාවලට සහය දීම සඳහා ඇමෙරිකා භට කණ්ඩායම් 4,565ක් පමණ මේ වනවිට ඉරාකයේ සිටින අතර ඔවුන් ඉරාක හමුදා පුහුණු කිරීමේ කටයුතුවල ද නිරතව සිටිති.
No comments:
Post a Comment