රුසියාව ද ඇතුළුව සිරියානු රජයේ මිත්‍ර පාර්ශව සෙනසුරාදා (1) එල්ල කළ ගුවන් ප්‍රහාරවලින් රෝහලක් විනාශ වී ඇතැයි කැරැලිකරුවෝ හා සහන සේවකයෝ චෝදනා කරති. එම ප්‍රහාරවලින් ඇලෙප්පෝ නරගයේ ප්‍රධාන රෝහල විනාශ වී ඇතැයි ද රෝගීන් දෙදෙනකු මිය ගොස් ඇතැයි ඔවුහු තවදුරටත් පවසති.
මෙම ප්‍රහාර නවතා දමා රාජ්‍ය තාන්ත්‍රික විසඳුමක් කෙරෙහි අවධානය යොමු කරන්නැයි ඇමෙරිකා එක්සත් ජනපදය නැවත වරක් රුසියාවට අවධාරණය කර ඇති අතර රුසියාවේ මැදිහත් වීම මේ වනවිට ඇමෙරිකාව කනස්සල්ලට හේතු වී ඇත. සිරියානු අර්බුදය සම්බන්ධයෙන් රුසියාව හා ඇමෙරිකාව අතර පසුගිය කාලය පුරාවට පැවැති සාකච්ඡා සියල්ල විසඳුමකින් තොරව අවසන් වූ අතර රුසියාව ඇලෙප්පෝ නුවරට ප්‍රහාර එල්ල කිරීමත් සමඟ රුසියාව ඇමෙරිකා අමනාපමකම් වැඩි ව ඇතැයි විදෙස් පුවත් සේවා වාර්තා කරයි.
රුසියාව ඇතුළු සිරියා රජයේ මිත්‍ර පාර්ශව සෙනසුරාදා දිනයේ ප්‍රහාර එල්ල කර ඇත්තේ කැරැලිකරුවන්ගේ ප්‍රධාන සැපයුම්මාර්ග ඉලක්ක කරගෙනය.
රුසියානු ජෙට් යානා හා සිරියානු හෙලිකොප්ටර් මිසයිල ප්‍රහාර හතක් එල්ල කර ඇතැයි ද මෙම ප්‍රහාරවලින් රෝගීන් දෙදෙනකු ජීවිතක්ෂයට පත්ව 13 දෙනකු තුවාල ලැබූ බව ඇමෙරිකා සහන සංවිධානයක් ප්‍රකාශ කර ඇත.
රුසියානු හා සිරියානු -ගුවන් ප්‍රහාරවලින් රෝහල සම්පූර්ණයෙන්ම විනාශ වී ඇතැයි වාර්තා වන අතර ප්‍රහාරය සම්බන්ධයෙන්ම ප්‍රංශය හා ජර්මනිය එසැණින්ම සිය විරෝධය පළ කර ඇතැයි ද වාර්තා වේ. වරදකරුවන්ට නීතිය ක්‍රියාත්මක කළ යුතු යැයි මේ සම්බන්ධයෙන් ප්‍රකාශයක් කරමින් ප්‍රංශ විදේශ අමාත්‍ය ජීන් මාර්ක් පවසා ඇත. ඇලෙප්පෝ නුවර සිදුවන බෝම්බ පිපිරීම් කෙසේ හෝ නැවැත්විය යුතු බවත් ත්‍රස්තවාදීන්ට එරෙහිව ප්‍රහාර එල්ල කරන කිසිවෙක් රෝහල්වලට ප්‍රහාර එල්ල නොකරන බව ජර්මානු විදේශ අමාත්‍ය ෆ්‍රෑන්ක් වෝල්ටර් ට්විටර් පණිවිඩයක් තබමින් සඳහන් කර ඇත.
රුසියාව සිදු කරන කටයුතු ත්‍රස්තවාදයට එරෙහිව ක්‍රියාත්මක වන ඒවා නොවන බවත් එම ප්‍රහාර මිලේච්ඡත්වය පිළිඹිඹු කරන බවත් එක්සත් ජාතීන්ගේ සංවිධානය පත් කර තිබෙන ඇමෙරිකා නියෝජිතයා පසුගිය සතියේ චෝදනා කළේය.
ඇමෙරිකා රාජ්‍ය ලේකම් ජෝන් කෙරී හා රුසියා විදේශ අමාත්‍ය සර්ගේ ලැව්රෝව් අතර මේ වනවිටත දුරකතන සංවාද කිහිපයක් පවත්වා ඇති අතර තත්ත්වය පාලනය කිරීමට රුසියාව අවධානය යොමු කර ඇතැයි විදෙස් මාධ්‍ය වාර්තා කර තිබුණි.
කෙසේ වෙතත් මැදහත් පාර්ශව හා ත්‍රස්තවාදීන් වෙන් කිරීමට ඇමෙරිකාව අපොහොසත් වී ඇතැයි රුසියා විදේශ අමාත්‍යවරයා පසුගිය දිනෙක චෝදනා කළේය. ත්‍රස්ත සංවිධානයක් ලෙසින් හැඳින්වෙන අල් නුස්රා පෙරමුණ සැප්තැම්බර් 9 වැනිදා රුසියා ඇමෙරිකා සටන් විරාමය කඩ කළ බවට ද රුසියාව චෝදනා කරයි.
No comments:
Post a Comment