සිරියාව ඔවුන්ගේ අනාගතය තීරණය කළ යුතු බවට සියලු පාර්ශව එකඟතාව පළ කළ බව රුසියාව සඳහන් කරයි. සිරියාවේ අර්බුදය සාකච්ඡා කිරීම සඳහා ස්විට්සර්ලන්තයේ ලොසෑන්හිදී ඊයේ (15) පැවැති අමාත්‍යාංශ මට්ටමේ සාකච්ඡාවෙන් අනතුරුව රුසියාව ඒ බව සඳහන් කළේය.
කෙසේ වෙතත් ඒකාබද්ධ නිවේදනයකින් ද තොරව මෙම සාකච්ඡාව අවසන් වූ අතර ඉදිරියේදී ද සාකච්ඡා පැවැත්වීමට තීරණය වී ඇතැයි ද විදෙස් මාධ්‍ය වාර්තා කර තිබුණි.
එම සාකච්ඡාවලට සිරියානු අර්බුදයට මැදිහත් වී සිටින සියලු පාර්ශව සම්බන්ධ විය යුතු බව ද රුසියාව එහිදි පෙන්වා දී ඇත. පැය හතරක් පුරාවට පැවැති සාකච්ඡාවල කැඳවුම්කරු වූයේ ඇමෙරිකා එක්සත් ජනපද රාජ්‍ය ලේකම් ජෝන් කෙරීය. රුසියාව, ඉරානය, ඉරාකය, සෞදි අරාබිය, තුර්කිය, කටාරය, ජෝර්දානය සහ ඊජිප්තුව යන විදේශ අමාත්‍යවරු ඊට සහභාගී වූහ. එමෙන්ම ඊට සිරියාව වෙනුවෙන් පත් කරන සිටින එක්සත් ජාතීන්ගේ විශේෂ නියෝජිත ස්ටැෆැන් ද මිස්තූරා ද සහභාගි විය.
සිරියානු අර්බුදයට විසඳුම් සෙවීම සඳහා ඉදිරියේදී නැවත සහභාගී වී සාකච්ඡා කිරීමට සහභාගි වූ පිරිස එකඟත්වය පළ කළ බව සාකච්ඡාවෙන් පසුව රුසියා විදේශ අමාත්‍ය සර්ගේ ලැව්රෝව් පැවැසීය.
එසේම සාකච්ඡා අතරවාරයේදී වැදගත් අදහස් කිහිපයක් ම මතු වූ බවත් ඒ සම්බන්ධයෙන් සාකච්ඡා කළ බව ද ඔහු කීවේය.
මත ගැටුම් හා කලබලකාරී ගතියක් ගත්ත ද, සාකච්ඡා ප්‍රතිඵලදායක බව ඇමෙරිකා එක්සත් ජනපද රාජ්‍ය ලේකම් ජෝන් කෙරී පවසා සිටියේය.
සැප්තැම්බර් මාසයේදී සටන් විරාමය කඩවීමෙන් පසු ජෝන් කෙරී සහ සර්ගේ ලැව්රෝව් හමු වූ පළමු අවස්ථාව මෙය විය.
මැදිහත් අදහස් දරන සිරියාවේ විපක්ෂ කණ්ඩායම් ත්‍රස්තවාදීන්ගෙන් වෙන් කරගන්නේ කෙසේ දැයි සාකච්ඡා කිරීමට මෙම හමුවේදී වැඩි ඉඩක් ගත වූ බව ඉරාන නියෝජ්‍ය විදේශ අමාත්‍ය හුසෙන් ජබෙරි අන්සාරි පැවැසීය.
රුසියාව ගුවන් ප්‍රහාර එල්ල කරන ප්‍රදේශවලින් ඇමෙරිකාවේ සහාය ලබන මැදිහත් විපක්ෂ කණ්ඩායම් ඉවත් විය යුතු බවත් එවිට ත්‍රස්තවාදීන් ඉලක්ක කරගෙන කරන ප්‍රහාරවලින් ඔවුන්ට හානියක් නොවන බවත් මෙම සාකච්ඡාවේදී රුසියාව පෙන්වා දී ඇත.
සටන් විරාමය කඩවූයේ ඇයිද යන්නනත් මානුෂීය සහ වෛද්‍ය ආධාර දීම සම්බන්ධයෙන් මෙහිදි සාකච්ඡාවට ලක්වී ඇත.
සිරියාවේ දෙවැනි විශාලතම නගරය වන ඇලෙපෝ නගරය 2012 වසරේ සිට බෙදී ඇත. එක් කොටසක පාලනය විදේශ සහාය ලබන සටන් කණ්ඩායම් සතුවන අතර අනෙක් කොටසේ පාලනය ඇත්තේ රජයේ හමුදා සතුවය.
මෙම සාකච්ඡාවලට අමතරව සර්ගේ ලැව්රෝව් ඉරාන විදේශ අමාත්‍ය මොහොමද් ජාවද් සරීෆ් සහ ඉරාක විදේශ අමාත්‍ය ඊබ්‍රාහිම් අල් ජාෆාරි සමඟ ද සාකච්ඡා පැවැත්වීය.
එක්සත් ජාතීන්ගේ සංවිධානයට අනුව 2011 වසරේ මාර්තු මාසයේදී ආරම්භ වූ සිරියා අර්බුදයෙන් මෙතෙක් මිය ගණන 400,000කට ඉක්මවා ගොස් ඇත.
රොයිටර් ඇසුරිනි
No comments:
Post a Comment